يا بحــــر أسرارك ليه عني مخبّيهــــــــا
و أنا ســري معاك كما الميه معبّيهـــــــــا
برمل شطك بنيت قصور وكنت اعلّيهـــــــا
واحلـم أعيشها بموجة منك تيجي و تفنيها
وعجبي
سألتك يا بحــر هايج قـول فين مراسينـــــا
خرجنا نقصـد كريم ليه تعمــل كده فينـــــــا
ضاع الأمان ع الأرض وف البحر ما رسينا
حكمتـــك يا رب ... و صبّـر أهالينــــــــــــا
وعجبي
عرفينك يا بحــــــر والله عرفينك
مالــح يا بحر و برضــــــه حبينك
وتغرق ولادنا فيك وبرضه بنجيلك
العيب فيك يا بحـر ولا فـــ محبينك
وعجبي
فارض قلوعي يا بحر وبدور علي مرسي
عايش حياتي ف قهر يمكن ف يوم أرسي
رد علي البحــر انسي يا حلــــــــــو انسي
دا الدنيــا زي البحـــــــــر شطين ومرسي
وعجبي
يا بحر خاطــــر علي بالــــــــي
أخوضــك بس القـلاع بالــــــي
فقير يا بحــر وأصل دا حـــــالي
بس أهي فكرة والفكرة تحلا لي
وعجبي
يا بحـــر أنا فيك تـــاه مني عنواني
و أنا ف خضمّك تعبان ... و باعاني
يا بحـر فين شطك دا الغربـــة تعباني
وصّلني يا مركب وتوبة الرجوع تاني
وعجبي
ليست هناك تعليقات:
إرسال تعليق