يَعْنِى أَيه
يَعْنِى أَيه كَلِمَة أَنَا ؟
يَعْنِى يَوْم وَرَا يَوْم يمُر
وَالْنَتِيْجَة كَام سنَّة
هُو دَه يَعْنِى أنَا ؟
ولّا أَنَا لِيْهَا مَعْنَى تَانِّى
تَاه فِي تُوهَة الْمَعَانِى
وَالْنَتِيْجَة هِى هِى
إِنِّ أَنَا....... مَا أَنَا ؟
يعنى أيه
يعنى أيه كلمة حوار ؟
يعنى للنفس انتصار
ولّا هوجه بالكلام
زى هوجة التتار
وهو ده يعنى الحوار ؟
ولّا هو فذلكه
ولّا يمكن تكتكه
لجل تبقى أنتكه
ولّا الحوار ليه معنى تانى
تاه في توهة المعانى
والنتيجة هى هى
إنِّ الحوار .... ما حوار ؟؟
يَعْنِى أَيه
يَعْنِي أَيه كَلِمَة وَطَن ؟
يَعْنِى أرض وناس وسكن
ولّا نَاس مَلْهَاش تَمن ؟!
مرّ عليهم الزمن
يحلموا بمعنى الوطن
يَعْنِي أَيه كَلِمَة وَطَن ؟
يَعْنِى وَاو و طَا وَنُوْن
عملوا ليها كام قانون
زى رز باللبن
يَعْنِي أَيه كَلِمَة وَطَن ؟
يَعْنِي ناس عاشوا في حدوده
يحلموا بخيره وجوده
ضحوا ليه بلا تمن
هُو دَه يَعْنِى الْوَطَن ؟
ولّا الْوَطَن لِيَه مَعْنَى تَانِّى
قَالهُ الْشُّعَرَا فِى الأَغَانِى
يتقال في عيدك يَا وَطَن
هُو دَه يَعْنِى الْوَطَن ؟
يَا وَطَن أنا فيك بَاعَانّى
و يمْكِن فى لك مَعْنَى تَانِّى
تَاه فِي تُوهَة الْمَعَانِى
وَالْنَتِيْجَة هِى هِى
إِنِّ وَطَن ..... مَا وَطَن ؟
يعنى أيه
يعنى أيه كلمة انتخاب ؟
يعنى تزوير النتيجة
لجل تغّيب الحقيقة
بألف باب
هو ده يعنى انتخاب ؟!
ولّا انتخاب ضياع لصوتى
ولّا تخطيط لنهب قوتى
ولّا سكة نهايتها موتى
و أهو سبب من الأسباب
هو ده يعنى انتخاب ؟!
ولّا انتخاب تخطيط حكومى
يسرقوا راحتى و نومى
يجعلوا أمسى و يومى
هباب مغلف بالعذاب
هو ده يعنى انتخاب ؟!
ولّا انتخاب ليه معنى تانى
تاه في توهة المعانى
والنتيجة هى هى
إِنِّ انتخاب ... مَا انتخاب ؟
يعنى أيه
يعنى أيه كلمة
ثورة ؟
يعنى تغير النظام
ولّا تأميم القنال
و لّا جعجعة و فورة ؟
هى دى يعنى ثورة ؟!
ولّا ثورة نجيب رئيس
يبقى أبنه فى يوم وريث
و تبقى الثورة يا صاحبى عورة
هى دى يعنى ثورة ؟!
ولّا ثورة يفطة لشارع
تكتب والشعب جايع
و الثورة تبقى لأصحبها ثروة
هى دى يعنى ثورة ؟!
ولّا الثورة ضمير يموت
و احتلال والناس سكوت
و مقبرة و سجن و تبوت
و الحقيقة المُرة ثورة
هى دى يعنى ثورة ؟!
ولّا الثورة عيشة مُرة
زى زوجة وليها ضُرة
و يبقى تحيا الثورة حُرة
و الشعوب تحيا فى جرة
و المهم عملنا ثورة
هى دى يعنى ثورة ؟!
ولّا ثورة ليها معنى تانى
تاه فى توهة المعانى
و النتيجة هى هى
إنِّ ثورة ... ما ثورة ؟
يعنى أيه
يعنى أيه كلمة معارضة ؟
يعنى شُغلة الأونطة
ولّا حزب بألف يفطة
ولّا طبخة وعليها شطة
هى دى يعنى المعارضة ؟!
ولّا المعارضة تذويق نظام
كتر عليه الكلام
و لجل يهرب م الملام
قال الفار لازمله قطة
هى دى يعنى المعارضة ؟!
ولّا المعارضة تنفيس لشُحنة
لجل تمرير ألف محنة
و المعارضة والحكومة يكلوا لحمة
و ع الشعب يابا ألف رحمة
هى دى يعنى المعارضة ؟!
ولّا المعارضة برواز و صورة
ولّا تور فى الساقية يروى
كل قرارات الحكومة
ويبقى الشيئ لزوم الشيئ
تكتمل بيه المنظومة
هى دى يعنى المعارضة ؟!
ولّا المعارضة ليها معنى تانى
تاه فى توهة المعانى
و النتيجة هى هى
إنِّ معارضة ... ما معارضة ؟
يعنى أيه
يعنى أيه كلمة سياسة ؟
يعنى دلّس و ارتشى
ولّا اكدب وانتشى
ولّا أوعاك تختشى
ولّا بنى و مشمشى
و لّا نحيا فى انتكاسة
هى دى يعنى السياسة ؟
ولّا السياسة كارنيه وحصانة
لجل تبقى الفلوس مُصانة
يعنى سرقة بالرزانة
و اهو نوع و شغل م الكهانة
و الكياسة
هى دى يعنى السياسة ؟!
ولّا السياسة غمض عنيك
عن الحقيقة
و افتح سجونك
لنفوس بريئة
و اظلم فى شعبك
بميت طريقة
يعنى شُغلة افتكاسة
هى دى يعنى السياسة ؟!
ولّا السياسة تبيع أبوك
و تخون أخوك
و لو ولادك فى يوم شفوك
أو عابوا فعلك أو يوم لموك
قول لجل الكرسى و الرياسة
هى دى يعنى السياسة ؟!
ولّا السياسة ليها معنى تانى
تاه فى توهة المعانى
و النتيجة هى هى
إنِّ السياسة ... ما السياسة ؟
