بسأل

بسـأل ....

لإن من حقي الســـــؤال

و لإن الوضع زاد وبـــال

و الواقع قد فاق الخيـــال

بسـأل ....

ليه فـ عقر دارنا زاد الاعتــــــــــلال

ليه بقينا عبرة ينضرب بيها المثــال

و الفساد أصبح علاجه شيء محــال

و الهموم بتزيد و تعلى كالتـــــــــلال

بسـأل ....

لإن من حقي الســــؤال

و لإن الوضع زاد وبــال

و الواقع قد فاق الخيــال

بسـأل ....

ليه ميزان العدل يا بلدنا صابه بس الاختلال

و لى يعلي و لى يوصل بس عشاق النـعــال

و لى يبذل كل جهده و يسعى فيها للكـمــــال

يكون مصيره المشنقــة أو الاعتقـــــــــــــال

بسـأل .....

لإن من حقي الســــــؤال

و لإن الوضع زاد وبـــال

و الواقع قد فاق الخيـــال

بسـأل ....

الفن ليه الأصل فيها الابتـــــــــــــزال

و الرقابة ليه تجيز بس الضـــــــــلال

إللي يفسد النساء و الرجال و العيـال

و الجوايز تتوهب للخيابة و الخبـــال

بسـأل ....

لإن من حقي الســـؤال

و لإن الوضع زاد وبال

و الواقع قد فاق الخيال

بسـأل ....

ع الأمــاني و الأمــــــــال

و الطمــوح والرجـــــــال

إللي صنعوا فيوم محـــال

إللي عبروا فيوم قنــــــال

بسـأل ....

لإن من حقي الســؤال

و لإن الوضع زاد وبال

و الواقع قد فاق الخيال

بسـأل ....

الحرية ليه كـــــــــلام مش حقيقـــــــــــــة

و الحقيقة ليه تضيــع بميت طريقــــــــــــة

و الطريقة الصح محبوسة مش طليقـــــــة

و الطليقة م البشر بتعيش حريقة أو غريقة

بسـأل ....

لإن من حقي الســـؤال

و لإن الوضع زاد وبال

و الواقع قد فاق الخيـال

بسـأل ....

المدراس كات زمان تربيـــة و علــم و عـــــلام

و المدرس كان إمام قدوة لطــــــــلاب العـــــلام

و الأساس إللي ما بينهم شيء و اسمه الإحترام

ليه ... اتغير دا النظام و ليه أساسً مفيش نظام

بسـأل ....

لإن من حقي السـؤال

و لإن الوضع زاد وبال

و الواقع قد فاق الخيال

بسـأل ....

ع الأمـــــــــــــان ...

الأمان .... بتاع زمان

إللــــــــــي كـــــــــــان

من سمات هذا المكــان

هــذا المكـــــــــــان ...

إللي أصبح كالومـــــان


بسـأل ....

لإن من حقي السـؤال

و لإن الوضع زاد وبال

و الواقع قد فاق الخيال

بسـأل ....

الحرامي ليه في بلـدي يكـون أمـــــــير

و الشريف يكون يا بلــدي ليه أســـــير

أيه مشقلب الحكاية أيه ملغبـط المسـير

والمسير والمصير جوا بلدي شيئ عسير

رباعيـــــاتي المنوعة ..... ( 2 )

يا طير و طاير ف السما .. ايه .. كيف الحال

شيفك بتعلي بجناحك و الوضع عندك عــــال

بتزأزأ بصوتك زأزأة و تطربني كما المــــوال

دلني ع الوصفة .. أعملها.. لجل يروء البال

ــــــــــــــــــــــــــــــــــــــــــــــــــ

سألني طير كان ف السما طاير

يا ابن آدم مالك مهموم كده حاير

لقتني برد بغيظ و رحت أنا قايل

الهم يا طير كاس . وعالعباد داير

ـــــــــــــــــــــــــــــــــــــــــــــــ

كتر الظلم و زاد عليا و قلت أنا آآآآآآآآآآه

الناس عليا اتلموا وقالوا مريض يا ولداه

عجبي عليكم يا بشر متميزوا لنوع الأه

ولاّ كتر الظلم ف البلد دي خلا الكل تاااااه

ـــــــــــــــــــــــــــــــــــــــــــــــــــــــــــ

و الله العظيم صدقوني أنا شاااب

و لكن م الهموم أنا شعري شاااب

و ممكن أجيب الصبغة .. واصبغه

بس الحكاية .. مش ناقصة هباب

ــــــــــــــــــــــــــــــــــــــــــــــــــــــــــ

لكل منا خاتمة و نهاية و أجل محتوم

سوا كان حاكم أو كان فـيوم محكوم

و الكل عايش وعارف .. دي الحقيقة

والنتيجة .. ظالم ظلوم و كام مظلوم

ـــــــــــــــــــــــــــــــــــــــــــــــــ

في أرض الله الواسعة لفيت وطفت وشفت

في غابة دخلت وف صحرا مشيت ولا تهت

و ورا أسود وديابة جريت وصولت وجولت

و بصراحة و بدون كدب انا جوا بلدي خفت

ـــــــــــــــــــــــــــــــــــــــــــــــــــــــــــــ

في الغربة شوفنا العـذاب وباكينــــا

قلنا نرجع لحضنك يا بلـد ما دفينــــا

دلونا يا آهل الحكمة بوصفـة تشفينا

العيب بلـدنا ولاّ الغربة ولاّ فينا ؟؟؟!

ـــــــــــــــــــــــــــــــــــــــــــــــــــــــــــ

الغربة قلق وعذاب و مــرار

وفـ بلدي استقرار وذل وعار

وبين ده وده العقل ولّـه احتار

نعيشها عــذاب و مــــــــــــرار

ولاّ فـ ذل وعار ؟؟؟؟؟؟؟؟؟؟؟

ــــــــــــــــــــــــــــــــــــــــــــــــــــ

بلدي العزيزة مش وطـن

ولا في آمان ولا في سكن

وكل ما فيهــا محـــــــــن

وعشت فيه كل الحـــــزَن

وبحلم أعيش فيها الحسن

ـــــــــــــــــــــــــــــــــــــــــــــــــــــــ

يا بلدنا يا أرض الشهـــــــــامـــــــه

ليه بقينا بره جوا نقصانا الكرامــــه

إمتي يجي اليوم تتبدد فيه الغمامــــه

وفـ سماك تطير وتعلي تاني الحمامـه

ــــــــــــــــــــــــــــــــــــــــــــــــــــــ

لو تعرف يا آبن آدم معني الدنيا ترتـــــاح

وكنت خدت نصيبك بدون عذاب وجـــراح

و عشت فيها يومينك مطمن . ببال مرتاح

د الدنيا حبة قش اطحن . تــــذروه الرياح

ــــــــــــــــــــــــــــــــــــــــــــــــــــــــــ

بلدنا زي فرخة عريانة و ريشها منتـــوف

بلدنا زي كلمة مكتوبة بس ناقصة حــروف

بلدنا زى طفل بريئ من حضن أمه مخطوف

حاكمها عامل كل ده أصله مش وش كسوف

ــــــــــــــــــــــــــــــــــــــــــــــــــ

شغلت نفسي مـــرة بفكرة محيرة

البيضــــــة هي الأول ولاّ البربرة

مر كتكوت و قلى بنبرة متحسرة

بكفاية يا ابن آدم شغل المسخرة

ــــــــــــــــــــــــــــــــــــــــــــــــــــــ

منحوس ومن نحسي ضربت كف بكف

وعلي كعب رجلي مشيت لفيت لف ولف

لجل أوصل للحــــــــــظ والبليه مرة تلف

و بعد التعب واللف الحظ لمحني .. و تف

ــــــــــــــــــــــــــــــــــــــــــــــ

و الله العظيم صدقيني أنا كـــــــــداااااااب

عمّال أقلك يا أختي .. و قلبي فيكِ داااااب

أنا قلت الحقيقة خلاص وفاحتياج لجواب

الكدبة دي يا ربي . في عليها عقــاب ؟؟؟

ـــــــــــــــــــــــــــــــــــــــــــــ

بلدنا حلوة و جميلة تبدأ بحرف الــ ( م )

حاكمها اسمه بيبدأ برضو بحرف الـ ( م )

شوه بلدنا ولغبط حياتنا خلاها فعلاً ( ج )

واعذرني يا صاحبي أنا كاتب كلام بالسيم

ـــــــــــــــــــــــــــــــــــــــــــــــــــــــــــــــــــ

كوسه يا بلدى .. و قرع و بطاطــس

كوسه يا بلدى .. و مين يقدر ينافــس

حكومتك .. يا بلد دي حكومة الهجايص

و شبعك يا بلد .. فى الحوســه لايص

ـــــــــــــــــــــــــــــــــــــــــــــــــــــــ

الحكّام في الدنيا انـــــــــــــــــــــواع

نــــوع اشتري شعبــــــــــــه و راع

و نوع في شعبه أفســــــــد و بــــاع

و نوع طبق في شعبه فنون الضيـاع

ـــــــــــــــــــــــــــــــــــــــــــــــــــــــ

أنا إللي انكتب عليا أبقى فيها غريــب

و حقي فـ حضنها ضايع من التهليب

و بين ضلوعي م الظلم نـار و لهيـب

و علي لساني ديماً .. الله فرجـه قريب

ــــــــــــــــــــــــــــــــــــــــــــــــــــــــــ

يوم ورا يوم يا بلد و العيشة ذل فـ ذل

يوم ورا يوم يا بلد نحلــم بخير هيطل

لكن العجيب يا بلد الـذل فيكي ظــل !

و الخير لا جه ولا طل . ويبقى أيه الحل ؟

ــــــــــــــــــــــــــــــــــــــــــــــــــــــ

بلدنا بالمصرى حوارى و مزانــق

بلدنا بالمصرى محـارق مشانــق

بلدنا بالمصرى مواطـن وطاهــق

بلدنا بالمصرى قانـون الطــوارئ

ـــــــــــــــــــــــــــــــــــــــــــــــ

على الدنيا يمــر كتير م البشــر

واحــد يمر يعطّر و يترك أثـــــر

و واحد مجرد ذكره يجيب الكدر

و كله يمر و ينتهى و يبقى الأثر

رفرف يا علم رفرف .....

رَفْرَف يَا عَلم

رَفْرَف

رَفْرَف يَا عَلم

وَاعْرف

إِنِّي لجْل تبْقى عَالِي

دَمِي ينْزِف

إِنِّي لجْل تبْقى بَاقِي

نَن عيْنِى فَيَوْم ما يَطرف

رَفْرَف يَا عَلم

وَاعْرف

إِن نَّبَض قَلْبِى بَاقِى

لِمَا تعْلى تَطير تهَفْهف

رَفْرَف يَا عَلم

وَاعْرف

لَو تُدَاس أَو تُدَنس

مَوْتِى عنْدِى يبْقِى أَشْرَف

رَفْرَف يَا عَلم

وعْرّف

كُل خَايْن خَان وحَرّْف

كُل بَايَع لِلْقَضِيَّة لَجْل يُتْرَف

إِن فِيْه رِجَال تَصُونَك

فِى كُل مَوْقِف

إِن لِيَك رِجَال تضَحِّى بِكُل غَالِى

لجْل تُنْصف

رَفْرَف يَا عَلم

وعْرّف

يَا عَدُو فِيْه بِنَا مَوْقِف

دَمِع عيْنك فِيْه لتَزْرِف

دَمِّك فِيْه ليَسِيْل وَيَنْزِف

و رَفْرَف يَا عَلم

رَفْرَف